Ова

Не драга ова не е пост за љубовта,

Ова не е ни обид за да биде пост, а камо ли за љубовта,

Ова е уште едно клише, уште неколку несреќно избрани зборови,

Ова не е Новел Вог, нити песната која не е за љубовта,

Ова не е дождлив ден, ова не е поет, нити писател, а уште помалку човек...

Ова е како изгледа заборавот, ова е она што останува после воздишката,

Не, не е каење, тука ионака одамна веќе нема никој нити да се покае.

Ова е едно од оние збогувања со случаен сопатник во воз,

Ветувањата дека ќе се видите на кафе,

Ова е како звучи Скопје на -15

Ова е слободна за во автобус,

реплика од филм што се дава на неуспешните актери,

Ова е коса на патец, препознавање во диско,

Ова е молкот кој останува кога ќе кажеш сѐ,

Раце во џеб, скинат чевел и недостаток на калциум,

гризење нокти и секое броење на жмурка дури останатите се кријат!

Ова е дупната гума на кола!

Но ова никако не е пост за љубовта,

зашто едноставно не остана кој да го напише.